La Barcunata 14
Ogn’annu a stu paisi
scoppia n’epidemìa!
Si pronunziàu la scienza:
si tratta d’allergìa!
Ma no’ scropìu la càusa
de simili sciagura
e forte e ‘mprissionanti
s’allarga la pagùra!
Nu jomo capitàu
nu medicu analista;
restàu traseculatu,
quando lejìu la lista.
De tutti li corpìti,
longa de ccà all’Abbàti,
chi tanti curi ficeru,
ma senza risurtàti!
Nci vinne pe’ la mente,
nu’ jorno, a stu dotturi
mu pigghia e mu analizza
d’ognunu lu suduri.
No’ ‘nde trovàu na’ stizza
trà tutti chiji cagghj,
né sutta li masciji,
né a menzo a li ‘ngonagghi!
Allora capiscìu:
la brutta ‘pidemìa
era de la fatiga
la ‘ncognita allergia!
Perciò, ‘mbece mu ‘nietta
lu sero ‘dovinoso,
tridici misi all’annu,
nci ordinàu riposo!
Fu sarvu lu paisi
e ogn’annu si fa festa
ca’ scongiurata vinne,
de tandu ‘npoe la pesta;
E fannu tutti a gara
cui a la fatiga spara!